అంతర్జాతీయ అంతరిక్ష కేంద్రం (ఐఎస్ఎస్‌)లో వ్యోమగాముల జీవితం ఎలా ఉంటుందో అప్పుడప్పుడు కొన్ని అరుదైన దృశ్యాలు మనకు కనిపిస్తుంటాయి. తాజాగా, యూరోపియన్ స్పేస్ ఏజెన్సీ (ఈఎస్ఏ) వ్యోమగామి సోఫీ అడెనాట్, అంతరిక్షంలో తాను యోగా చేస్తున్న వీడియోను పంచుకొని అందరినీ ఆశ్చర్యపరిచారు. భూమ్యాకర్షణ శక్తి లేని (మైక్రోగ్రావిటీ) వాతావరణంలో తేలియాడుతూ ఆమె చేసిన 'యిన్ యోగా' విన్యాసాలు ఇప్పుడు సోషల్ మీడియాలో వైరల్ అయ్యాయి.

భూమిపై ఉన్నప్పుడు చాలా ఏళ్లుగా యోగాను తన దినచర్యలో భాగం చేసుకున్న సోఫీ, అంతరిక్షంలోనూ తన అలవాటును కొనసాగిస్తున్నారు. ఈ వీడియోను ఇన్‌స్టాగ్రామ్‌లో షేర్ చేస్తూ.. "ఒక రోజంతా బిజీగా గడిపిన తర్వాత సేద తీరడానికి ప్రతిరోజూ సాయంత్రం 30 నిమిషాల పాటు యిన్ యోగా చేస్తాను" అని ఆమె పేర్కొన్నారు.

సాధారణ యోగాకు, అంతరిక్షంలో చేసే యోగాకు చాలా తేడా ఉంటుంది. యిన్ యోగాలో నెమ్మదిగా, ఎక్కువ సమయం పాటు సాగదీసే ఆసనాలు ఉంటాయి. అయితే, జీరో గ్రావిటీ వల్ల శరీరానికి పట్టు దొరకదు. దీంతో ఆసనాలు వేయడం చాలా కష్టం. ఈ సవాలును అధిగమించేందుకు సోఫీ అంతరిక్ష కేంద్రంలోని గోడలకు ఉన్న హ్యాండిల్స్, పాదాలకు ప్రత్యేకమైన పట్టీలు, అలాగే శరీర నియంత్రణ (కోర్ కంట్రోల్) వంటి వాటిని ఉపయోగించుకుంటున్నారు. దీని ద్వారా కండరాలకు అవసరమైన స్ట్రెచింగ్ సాధ్యమవుతోంది.

ఈ వీడియో చూసిన నెటిజన్లు ఆనందం వ్యక్తం చేస్తూ కామెంట్ల వర్షం కురిపిస్తున్నారు. "స్పేస్ యోగా చూడటానికి అద్భుతంగా, ఎంతో అందంగా ఉంది" అని ఒక యూజర్ కామెంట్ చేయగా, "భూమికి సంబంధం లేకుండా ఆసనాలు వేస్తే ఎలా ఉంటుందో తెలుసుకోవాలని ఉంది" అని మరో యూజర్ తన ఆసక్తిని పంచుకున్నారు. "సైన్స్, కళ, వినోదం.. అన్నీ ఒకేచోట చూపించి మాలో స్ఫూర్తి నింపుతున్నారు" అంటూ మరికొందరు ఆమెను ప్రశంసించారు.

అంతరిక్షంలో మానవ శరీరం ఎలా స్పందిస్తుంది, యోగా టెక్నిక్స్‌ను ఎలా మార్చుకోవాలి అనే అంశాలపై త్వరలోనే ఒక పూర్తిస్థాయి వీడియోను విడుదల చేస్తానని సోఫీ అడెనాట్ తెలిపారు. వ్యోమగాములు కేవలం శాస్త్రీయ ప్రయోగాలకే పరిమితం కాకుండా తమ మానసిక, శారీరక ఆరోగ్యాన్ని కాపాడుకోవడానికి ఇలాంటి పద్ధతులు పాటిస్తారని ఈ వీడియో స్పష్టం చేస్తోంది.