చనిపోయిన పాము ప్రమాదం కాదనుకుంటే అది పెద్ద పొరపాటేనని చైనాలో జరిగిన ఓ ఘటన గుర్తు చేసింది. విషసర్పం తలను నరికేసిన తర్వాత ప్రమాదం తప్పిందనుకున్న 72 ఏళ్ల వృద్ధుడికి అదే పాము తల కాటేసింది. ఈ ఘటనలో అతడి చేయి తీవ్రంగా దెబ్బతింది. వైద్యులు వరుస శస్త్రచికిత్సలు చేసి దాదాపు రెండు నెలల పాటు చికిత్స అందించడంతో చివరకు అతడి చేతిని కాపాడగలిగారు.

తూర్పు చైనాలో ఈ ఘటన జరిగింది. ఓ తాచుపాము కనిపించడంతో వృద్ధుడు దాన్ని చంపేందుకు తల నరికేశాడు. దీంతో ప్రమాదం తప్పిందని భావించాడు. అయితే ఐదు నిమిషాల తర్వాత నరికిన పాము తలను తీసేందుకు ప్రయత్నించగా అది ఒక్కసారిగా అతడి అరచేతిని కాటేసింది. పాము చనిపోయినప్పటికీ తలలోని విషగ్రంథులు పనిచేయడం వల్ల విషం శరీరంలోకి వెళ్లింది.

కాటు కారణంగా వృద్ధుడి చేతిలోని కణజాలం తీవ్రంగా దెబ్బతింది. వెంటనే అతడిని ఆస్పత్రికి తరలించారు. విషం మరింత వ్యాపించకుండా అత్యవసర చికిత్స ప్రారంభించారు. తర్వాత పలు దఫాలుగా శస్త్రచికిత్సలు చేసి దెబ్బతిన్న కణజాలాన్ని తొలగించారు. దాదాపు రెండు నెలల చికిత్స తర్వాత చేయిని పూర్తిగా తొలగించాల్సిన పరిస్థితి తప్పిందని వైద్యులు తెలిపారు.

తాచుపాము విషం కణజాలాన్ని వేగంగా నాశనం చేస్తుందని వైద్య నిపుణులు చెబుతున్నారు. రక్తనాళాలపై కూడా తీవ్ర ప్రభావం చూపుతుందని వివరించారు. చికిత్స ఆలస్యమైతే శాశ్వత వైకల్యం వచ్చే ప్రమాదం ఉంటుందని హెచ్చరించారు. ఈ ఘటనలో సకాలంలో ఆసుపత్రికి చేరుకోవడం వల్లే వృద్ధుడి చేయిని కాపాడగలిగామని వెల్లడించారు.

పాము చనిపోయినా కొంతసేపు దాని నాడీ వ్యవస్థ పనిచేస్తూనే ఉంటుందని వన్యప్రాణి నిపుణులు చెబుతున్నారు. అందువల్ల నరికిన తల కూడా కండరాల ప్రతిచర్య వల్ల కాటేయగలదని వివరించారు. అందుకే విషసర్పాలు చనిపోయిన తర్వాత కూడా వాటిని చేతులతో తాకొద్దని సూచిస్తున్నారు. ఒకవేళ చనిపోయిన పాము కాటేసినా కూడా వెంటనే ఆస్పత్రికి వెళ్లి చికిత్స తీసుకోవాలని, ఇంటి చిట్కాలపై ఆధారపడొద్దని నిపుణులు హెచ్చరిస్తున్నారు.