నేడు జరగనున్న ఐపీఎల్ ఎలిమినేటర్ పోరులో రాజస్థాన్ రాయల్స్తో పోలిస్తే సన్రైజర్స్ హైదరాబాద్కే స్పష్టమైన ఆధిక్యం ఉందని భారత స్పిన్ దిగ్గజం అనిల్ కుంబ్లే అభిప్రాయపడ్డాడు. జట్టులో లోతు, మ్యాచ్లను గెలిపించగల ఆటగాళ్లు ఎక్కువగా ఉండటమే హైదరాబాద్కు కలిసొచ్చే అంశమని విశ్లేషించాడు. చండీగఢ్లోని పీసీఏ స్టేడియం వేదికగా బుధవారం జరగనున్న ఈ నాకౌట్ మ్యాచ్పై కుంబ్లే తన అంచనాలను వెల్లడించాడు.
జియో హాట్స్టార్తో మాట్లాడుతూ కుంబ్లే ఈ వ్యాఖ్యలు చేశాడు. "రెండు జట్లను పోల్చి చూస్తే, సన్రైజర్స్లో మ్యాచ్ విన్నర్లు ఎక్కువగా ఉన్నారు. మరోవైపు రాజస్థాన్ జట్టు యశస్వి జైస్వాల్, వైభవ్ సూర్యవంశీ, జోఫ్రా ఆర్చర్ వంటి కొద్ది మంది ఆటగాళ్లపైనే ఎక్కువగా ఆధారపడి ఉంది. ఈ కీలక ఆటగాళ్లు విఫలమైతే, ఆ జట్టు బ్యాటింగ్, బౌలింగ్ రెండూ బలహీనపడతాయి. నాకౌట్ మ్యాచ్లో ఇదే ఫలితాన్ని నిర్దేశించవచ్చు" అని వివరించాడు.
ఈ సీజన్ లీగ్ దశలో రాజస్థాన్తో జరిగిన మ్యాచ్ సన్రైజర్స్ హైదరాబాద్కు ఒక టర్నింగ్ పాయింట్ అని కుంబ్లే గుర్తుచేశాడు. ఆ మ్యాచ్లోనే అరంగేట్రం చేసిన యువ పేసర్లు ప్రఫుల్ హింగే, సాకిబ్ హుస్సేన్ అద్భుత ప్రదర్శన చేశారని అన్నాడు. "ఆ మ్యాచ్కు ముందు హైదరాబాద్ జట్టు కూర్పు భిన్నంగా ఉండేది. యువ బౌలర్ల రాకతో వారు విజయాల ఫార్ములాను కనుగొన్నారు" అని పేర్కొన్నాడు.
ఈ నేపథ్యంలో, ఎలిమినేటర్లో హర్షల్ పటేల్ స్థానంలో ప్రఫుల్ హింగేను మళ్లీ తుది జట్టులోకి తీసుకునే అవకాశం ఉందని కుంబ్లే అంచనా వేశారు. గత మ్యాచ్లో వైభవ్ సూర్యవంశీని హింగే ఔట్ చేసినందున, మానసికంగా ఇది అతనికి కలిసొస్తుందని తెలిపారు. ఈ మ్యాచ్లో గెలిచిన జట్టు ప్లేఆఫ్స్లో ముందుకు సాగనుండగా, ఓడిన జట్టు టోర్నీ నుంచి నిష్క్రమిస్తుంది.
నేడు ఎలిమినేటర్లో రాజస్థాన్తో సన్రైజర్స్ ఢీ... ఎవరు బెటర్...?
