అహోబిలం టెండర్ల వివాదం.. ఎమ్మెల్యే అఖిలప్రియకు అధిష్ఠానం పిలుపు..

ఆళ్లగడ్డ ఎమ్మెల్యే, టీడీపీ నాయకురాలు భూమా అఖిలప్రియ వ్యవహారశైలిపై పార్టీ అధిష్ఠానం ప్రత్యేక దృష్టి సారించింది. నియోజకవర్గంలో ఇటీవల చోటుచేసుకున్న పరిణామాలపై తీవ్ర అసంతృప్తి వ్యక్తం చేసిన ముఖ్యమంత్రి నారా చంద్రబాబు నాయుడు, ఆమె నుంచి పూర్తిస్థాయి వివరణ కోరాలని పార్టీ రాష్ట్ర అధ్యక్షుడు పల్లా శ్రీనివాసరావును ఆదేశించారు.

ప్రముఖ పుణ్యక్షేత్రమైన అహోబిలం దేవస్థానానికి సంబంధించిన టెండర్ల ప్రక్రియలో వివాదాలు తలెత్తడం, ఈ అంశంపై నేరుగా ముఖ్యమంత్రికి ఫిర్యాదులు అందడంతో అధిష్ఠానం దీనిని సీరియస్‌గా తీసుకుంది. నియోజకవర్గంలోని తాజా రాజకీయ పరిణామాల నేపథ్యంలోనే ఈ నిర్ణయం తీసుకున్నట్లు సమాచారం.

ఈ క్రమంలో, బుధవారం అఖిలప్రియతో ప్రత్యేకంగా సమావేశం కావాలని, నియోజకవర్గంలోని పరిస్థితులపై సమగ్ర వివరాలు సేకరించాలని పల్లా శ్రీనివాసరావుకు ముఖ్యమంత్రి స్పష్టమైన ఆదేశాలు జారీ చేశారు.