ఇరాన్ యుద్ధంలో వీరమరణం పొందిన భారత సంతతి అమెరికా సైనికురాలు, సార్జెంట్ ఏంజెల్ రాంపర్సద్కు న్యూయార్క్లో కన్నీటి వీడ్కోలు పలికారు. శుక్రవారం జరిగిన ఆమె అంత్యక్రియలకు సైనిక, ప్రభుత్వ ఉన్నతాధికారులతో పాటు వందలాది మంది ప్రజలు హాజరై నివాళులు అర్పించారు. "నా కూతురు నిజమైన హీరో" అంటూ ఆమె తల్లి కరోల్ ఎసెవెడో భావోద్వేగానికి గురయ్యారు.
ఏంజెల్ అంత్యక్రియలను పూర్తి సైనిక లాంఛనాలతో నిర్వహించారు. న్యూయార్క్ పోలీస్ విభాగానికి చెందిన డజన్ల కొద్దీ మోటార్సైకిళ్ల కాన్వాయ్ నడుమ ఆమె భౌతికకాయాన్ని చర్చికి, అనంతరం లాంగ్ ఐలాండ్లోని శ్మశానవాటికకు తరలించారు. ఈ కార్యక్రమాన్ని కొన్ని స్థానిక టీవీ ఛానెళ్లు ప్రత్యక్ష ప్రసారం చేశాయి.
న్యూయార్క్ గవర్నర్ కేథీ హోచుల్ ఆమె మృతికి సంతాపంగా రాష్ట్రవ్యాప్తంగా జాతీయ జెండాలను అవనతం చేయాలని ఆదేశించారు. "సార్జెంట్ రాంపర్సద్ ధైర్యసాహసాలతో, నిస్వార్థ సేవ చేశారు. ఆమె వంటి వీరుల వల్లే మన దేశం సురక్షితంగా ఉంది" అని పేర్కొన్నారు. అధ్యక్షుడు డొనాల్డ్ ట్రంప్ ఇరాన్ యుద్ధాన్ని వ్యతిరేకిస్తున్న న్యూయార్క్ మేయర్ జోహైర్ మందానీ సైతం చర్చికి వచ్చి నివాళులు అర్పించడం గమనార్హం.
ట్రినిడాడ్ నుంచి తన రెండేళ్ల వయసులో అమెరికాకు వలస వచ్చిన రాంపర్సద్, గత నెలలో జోర్డాన్లోని మువఫాక్ సల్తీ వైమానిక స్థావరంపై ఇరాన్ జరిపిన క్షిపణి దాడిలో మరణించారు. జులై 22న ఆమె మృతదేహాన్ని జోర్డాన్ నుంచి డోవర్ ఎయిర్ ఫోర్స్ బేస్కు తీసుకువచ్చినప్పుడు అధ్యక్షుడు డొనాల్డ్ ట్రంప్, యుద్ధ కార్యదర్శి పీట్ హెగ్సెత్ సైనిక లాంఛనాలతో స్వీకరించారు.
ఇరాన్పై అమెరికా యుద్ధం ప్రకటించినప్పటి నుంచి ఇప్పటివరకు 18 మంది అమెరికా సైనికులు మరణించారు. రాంపర్సద్తో పాటు మరణించిన మరో నలుగురి పేర్లను తొలుత 'ఇరాన్ యుద్ధ మృతులు'గా పెంటగాన్ ప్రకటించింది. కానీ, ఆ తర్వాత వారి పేర్లను 'విదేశీ ఆపరేషన్లు' అనే కొత్త జాబితాలోకి మార్చడం వివాదాస్పదమైంది. యుద్ధ మరణాల సంఖ్యను తక్కువ చేసి చూపేందుకే ఈ ప్రయత్నం జరిగిందని విమర్శలు వస్తున్నాయి. జులై 17న జరిగిన ఈ దాడిలో రాంపర్సద్తో పాటు కెప్టెన్ టైలర్ జేమ్స్ ఫీహాన్ (25), ప్రైవేట్ ఫస్ట్ క్లాస్ ఇసబెల్లా గొంజాలెజ్ (19) కూడా మరణించారు.
ఇరాన్ యుద్ధంలో మరణించిన భారత సంతతి సైనికురాలు ఏంజెల్ రాంపర్సద్..
