సోషల్ మీడియాలో కనిపించే అందమైన ఇళ్లను చూసి.. అదే తరహాలో మన ఇంటినీ తీర్చిదిద్దుకోవాలని చాలామంది అనుకుంటారు. ఒకే రకమైన సోఫాలు, రంగుల కాంబినేషన్లు, ఒకే తరహా లైట్లు.. ఇలా అన్నీ ట్రెండ్ ప్రకారం వెళ్లిపోతున్నారు. చూడటానికి బాగానే ఉన్నా.. ఇలాంటి ఇళ్లలో ఇంటి యజమాని అభిరుచి, వ్యక్తిత్వం కనిపించకుండా పోతుందని నిపుణులు చెబుతున్నారు.
మహిమా గ్రూప్ క్రియేటివ్ అండ్ ఆర్ట్ డైరెక్టర్ కీర్తి మదన్ ప్రకారం.. ఇంటిని డిజైన్ చేసేటప్పుడు చాలామంది చేసే పెద్ద తప్పు ఇదే. ప్రతీది పర్ఫెక్ట్గా ఉండాలని చూడటం వల్ల ఇంటికి ప్రత్యేకత ఉండదని ఆమె చెబుతున్నారు.
పర్ఫెక్ట్గా కనిపించాలనే తాపత్రయం
ఇటీవల ఇంటీరియర్ డిజైన్లో బ్యాలెన్స్, ఒకే తరహా రంగులు, ఫొటోల్లో అద్భుతంగా కనిపించే అలంకరణలకు ప్రాధాన్యం పెరిగింది. దీంతో ఒక ఇంటికీ మరో ఇంటికీ పెద్దగా తేడా కనిపించని పరిస్థితి వచ్చేసింది. ఇల్లు ఎంత చక్కగా ఉన్నా.. అందులో ఉండే వ్యక్తులు, వారి అభిరుచి కనిపించినప్పుడే ఆ డిజైన్కు అసలైన విలువ వస్తుందని కీర్తి అంటున్నారు.
ఖరీదైన వస్తువులే లగ్జరీ కాదు
లగ్జరీ అంటే ఖరీదైన వస్తువులు పెట్టడం లేదా ప్రతీది పర్ఫెక్ట్గా కనిపించేలా చేయడం కాదని ఆమె చెబుతున్నారు. వస్తువుల నాణ్యత, వాటి తయారీ, గదిలో వాటి అమరిక, వెలుతురు పడే తీరు వంటి చిన్న విషయాలే ఇంటికి ప్రత్యేకమైన అందాన్ని తీసుకొస్తాయని వివరిస్తున్నారు.
సోషల్ మీడియా ప్రభావం
డిజైన్ విషయంలో సోషల్ మీడియా మంచి స్ఫూర్తిని ఇస్తున్నా.. అదే సమయంలో కొత్త సమస్యనూ తెచ్చిందని కీర్తి చెబుతున్నారు. నచ్చిన డిజైన్ నుంచి స్ఫూర్తి పొందడం వేరు.. దాన్నే అచ్చుగుద్దినట్లు అనుసరించడం వేరని అంటున్నారు. ఇలా ట్రెండ్స్ను వరుసగా కాపీ చేస్తూ పోతే.. ప్రతి ఇంట్లో ఒకే రకమైన సోఫాలు, లైట్లు, రంగులు కనిపిస్తాయని చెబుతున్నారు.
ఏళ్ల తర్వాతా నచ్చేలా
ఇంటీరియర్ డిజైన్ అంటే ఈరోజు ట్రెండ్లో ఉండటమే కాదని కీర్తి అంటున్నారు. కొన్ని సంవత్సరాల తర్వాత చూసినా అందంగా, ప్రత్యేకంగా అనిపించేలా డిజైన్ చేయాలని సూచిస్తున్నారు. నాణ్యత, ఉపయోగం, సరైన అమరిక, సొంత ఆలోచనకు ప్రాధాన్యం ఇస్తే.. ఆ డిజైన్ త్వరగా పాతబడిపోదని చెబుతున్నారు.
గుర్తుండిపోయేదే అసలైన డిజైన్
అందరి దృష్టినీ ఒక్కసారిగా ఆకర్షించేదే గొప్ప డిజైన్ కాదని కీర్తి అభిప్రాయపడ్డారు. చూసిన వెంటనే మర్చిపోకుండా.. కొంతకాలం తర్వాత కూడా గుర్తుండిపోయేలా ఉండేదే మంచి డిజైన్ అని చెప్పారు. ఇంటిని అలంకరించుకునేటప్పుడు ట్రెండ్ కంటే తమకు నచ్చిన శైలి, తమ వ్యక్తిత్వానికి తగ్గ అంశాలకు ప్రాధాన్యం ఇవ్వాలని సూచించారు.
ఇంటి డిజైన్లో పర్ఫెక్షన్ కోసం వెంపర్లాడొద్దంటున్న నిపుణులు..
