నటుడు సిద్ధార్థ్ త్వరలో ఒక ఆసక్తికరమైన పాత్రలో ప్రేక్షకుల ముందుకు రాబోతున్నారు. 1999 కార్గిల్ యుద్ధ సమయంలో భారత వైమానిక దళం (IAF) చేపట్టిన ‘ఆపరేషన్ సఫేద్ సాగర్’ ఇతివృత్తంతో నెట్ఫ్లిక్స్ రూపొందిస్తున్న వెబ్ సిరీస్లో ఆయన ఐఏఎఫ్ పైలట్గా నటించారు. ఈ సిరీస్ చిత్రీకరణ సమయంలో తనకు ఎదురైన సవాళ్లు, కఠినమైన శిక్షణ గురించి ఆయన తాజాగా పలు ఆసక్తికర విషయాలను వెల్లడించారు.
షూటింగ్ కోసం ఫ్లైట్ సీక్వెన్స్లను అత్యాధునిక సాంకేతికతతో భూమిపైనే చిత్రీకరించినట్లు సిద్ధార్థ్ తెలిపారు. ఇందుకోసం వాస్తవ కాక్పిట్ను తలపించేలా ఒక ప్రత్యేక సెట్ను హైడ్రాలిక్ గేర్ సిస్టమ్పై రూపొందించారు. నటీనటులు జీ-సూట్తో సహా పూర్తిస్థాయి పరికరాలను ధరించి కాక్పిట్లో కూర్చుని నటించారు. ఈ వ్యవస్థను ఒక కంప్యూటర్ ప్రోగ్రామ్తో అనుసంధానం చేయగా, యుద్ధ విమానం ఎంత వేగంతో, ఏ దిశలో ప్రయాణిస్తుందో, అదే తరహా కదలికలను ఈ సెట్ కూడా ప్రతిబింబించేలా తీర్చిదిద్దారు.
కంప్యూటర్ ప్రోగ్రామ్ కదలికలకు అనుగుణంగా నటులు తమ కదలికలను కచ్చితంగా సమన్వయం చేసుకోవాల్సి ఉండేదని సిద్ధార్థ్ వివరించారు. ఏమాత్రం తేడా వచ్చినా, వ్యతిరేక దిశలో కలిగే కదలికల వల్ల తలలకు గాయాలయ్యే ప్రమాదం ఉండేదని, అందుకే ఈ షూటింగ్ ప్రక్రియ అత్యంత కష్టంగా అనిపించిందని పేర్కొన్నారు. వైమానిక దళ నేపథ్యం ఉన్న ప్రాజెక్టులో నటించడం, ఈ తరహా చిత్రీకరణలో పాల్గొనడం తనకు ఇదే మొదటిసారని ఆయన వెల్లడించారు.
ముంబైలో జరిగిన ప్రచార కార్యక్రమాల్లో సహ నటులు జిమ్మీ షెర్గిల్, మిహిర్ అహూజాలతో కలిసి సిద్ధార్థ్ ఈ విశేషాలను పంచుకున్నారు. ‘ఆపరేషన్ సఫేద్ సాగర్’ వెబ్ సిరీస్ ఆగస్టు 7వ తేదీ నుంచి నెట్ఫ్లిక్స్లో స్ట్రీమింగ్ కానుంది.
'ఆపరేషన్ సఫేద్ సాగర్' కోసం సిద్ధార్థ్ సాహసం..
